PAT

Irailean zehar PATen aurkezpenak burutuko dira unibertsitatean

2010-09-03T14:43:00

Unibertsitatean ikasturte berria hastera doa eta martxan jartzeko garaia dugu. Soberan ezagutzen dugu zein den herri honetan bizi dugun egoera: udan zehar herrietan nahiz espetxeetan jazotakoak ikusi besterik ez dago. Errepresioak geroz eta gogorrago kolpatzen gaitu eta, horregatik, amnistiaren aldeko eta errepresioaren aurkako ikasleon borroka ezinbestekoa da garai hauetan.

Alde batetik, preso politikoen afera daukagu. Euskal Preso Politikoen Kolektiboaren gaineko presioa gero eta handiagoa da: preso gaixoak kartzelan mantentzea, ezkutuko biziarteko zigorra, bakartzea, isolamendua, manipulazio mediatikoa... Espainiar eta Frantziar Estatuak nazioarteko legeria eta eskubide hitzarmen ororen aurka ari dira.

Ikasle presoen egoera ere ez da nolanahikoa. Euren eskubideen kontra, Espainiar Estatuan preso dauden kideek debekatuta daukate unibertsitatean ikastea. Bitartean, Frantziar Estatuan ere okerrera doa kontua. Orain arte ikasteko eskubidea onartuta bazuten ere, gaur egun, lortutako emaitza akademikoak ezerezean uzteko mehatxua jaso dute. Horregatik, PATen erronketako bat, EPPKko kideen egoera lazgarria salatzeaz gain, presoen ikasteko eskubidearen aldarrikapena ozen entzunarazi eta gauzak alda daitezen unibertsitatean eragitea izango da.

Bestetik, errepresioak bere horretan segitzen duela ukaezina da. Azken hilabeteotan, errepresaliatu politikoenganako elkartasuna ezabatzen saiatu dira inoiz baino gehiago. Debekuak, kargak, atxiloketak, zitazioak, mehatxuak eta muntaia polizialak eguneroko ogia dira egun hauetan.

Kolaborazio eskaera eta bahiketen kasuak ere gero eta gehiago dira. Gerra zikinaren garaiak Euskal Herrira bueltatzen ari dira. Espainiar okupazio indarrak azken hilabeteotan hainbat euskal herritarrengana jotzen ari dira beraiekin kolaboratu dezaten eskatuz. Eskaera hori mehatxuez, presioez eta txantaiaz lagunduta joan ohi da gehienetan, herritarra bakarrik eta indefentsio egoeran dagoenean: kontroletan, leku ezkutuetan... Espainiar poliziekin kolaboratuko duten herritarrak nahi dituzte, informazio politikoa lortzeko, askapen mugimenduaren barne mailako informazioak lortzeko, pertsona zehatzen jarduera politikoaren gaineko informazioak lortzeko... Diktaduretan ohikoak diren jarduera hauek erabat aktibatuak ditu espainiar gobernuak militante independentisten aurka.

Aurrez ere gerra zikina ondo ezagutzen duen herria da gurea, eta GALen garaietan bezala, kalean, lantegian, unibertsitatean, mobilizazioetan erantzun behar diogu XXI. mendeko gerra zikinari. Jon Anza euskal militantearen erailketa dugu adibiderik hurbilena, eta inoiz baino argiago dugu Jonen erailketa ere espainiar barne ministeritzan marrazturiko gerra zikinaren praktikaren ondorioa izan dela, beti ere frantziar gobernuaren konplizitate eta babesarekin.

Zentzu honetan, unibertsitatean errepresioaren aurpegi guztiak salatzen jarraituko dugu aurten ere inoiz baino indar gehiagoz.

EUSKAL PRESOAK EUSKAL HERRIRA!
ASKI DA! ERREPRESIOA EZ DA BIDEA!
AMNISTIA ETA ASKATASUNA!

Udako etenaldia

2010-06-09T12:15:00

Presoen Aldeko Taldeen borroka-eremua unibertsitatea izanik eta 2009-2010 ikasturtea bukatu denez, irailera bitarteko etenaldia egingo du PATek.

Hala ere, www.pat-eh.org webguneak martxan jarraituko du udan zehar orain arte bezala Euskal Herrian jazotzen denari buruzko informazioa zuen eskura jarriz.

Irailera arte beraz.

Amnistiaren bidean, euskal presoak Euskal Herrira!

Presoek Hego Euskal Herriko unibertsitateetan ikasteko eskubidea aldarrikatu dute eragile eta norbanako ugarik

2010-05-28T22:42:00

- audioa (CC-By: Ukberri.net): MP3

prentsaurrekoa (CC-By: Ukberri.net)

Hego Euskal Herriko unibertsitateetan ikasturte osoan zehar eraman den euskal presoen ikasteko eskubidearen aldeko dinamikaren balantzea aurkeztu eta Hezkuntza-arduradunen esku hartzea eskatzeko prentsaurrekoa burutu da gaur eguerdian Eusko Jaurlaritzaren Hezkuntza Sailaren Bilboko Lurralde Ordezkaritzaren sarreran.

Prentsaurrekoan ELA, LAB, STEE-EILAS, SalHaketa, Etxerat eta Hego Euskal Herriko unibertsitateetako ikasle, irakasle, langile eta eragile anitzek parte hartu dute. Agerraldiaren bukaeran, berriz, Isabel Celaá Hezkuntza sailburuarekin bilera egiteko eskaera erregistratu da.

Guztion izenean mahaian izan ditugu:

- ELAko Amaia Egurrola
- LABeko Josetxu Aizpurua
- STEE-EILASeko Arantza Urkaregi
- Etxerat-eko Beñat Zarrabeitia

PRENTSAURREKOAREN EDUKIA

Eusko Jaurlaritzaren Hezkuntza Sailaren Bilboko ordezkaritzaren sarreran, Euskal Herriko Unibertsitateko, Nafarroako Unibertsitate Publikoko, Deustuko Unibertsitateko, Universidad de Navarrako eta Mondragon Unibertsitateko eragile ezberdinak bildu gara euskal presoek Hego Euskal Herriko unibertsitateetan ikasteko duten eskubidea urratzen dela salatzeko.

Espainiar eta Frantziar Estatuek nahiz nazioarteko erakunde ezberdinek onartutako legedi, araudi eta eskubide-adierazpenek, euskal presoek ikasteko eskubidea badutela baieztatzen dute ezbairik gabe. Hala ere, gaur egun, eskubide hau ez da bermatzen:

- Espainiar espetxeetan dauden euskal presoek debekatuta daukate UPV/EHUn, UPNA/NUPen, Deustuko Unibertsitatean, Universidad de Navarran edo Mondragon Unibertsitatean ikastea, ikasketak UNEDen bidez eta gaztelaniaz burutzera behartzen dituztelarik. Beraz, hezkuntza eskubidea urratua izateaz gain, hizkuntza eskubidea ere ez dute errespetatua.

- Frantziar kartzeletan dauden euskal presoen kasuan, gainera, antzeko egoera batetan aurkitzen dira gaur egun ere. Orain arte UPV/EHUn ikasteko aukera bazuten, ikasturte honetan, Espainiako epaitegiek presoen ikasketak arautzen zituen protokoloa indargabetzearen ondorioz, ezinezkoa izan zaie ikasketekin jarraitzea. Egoera berri honek, bestalde, kolokan uzten du espetxeetan dagoeneko ikasketak bukatuta edo erdibidean dauzkaten presoen egoera.

Egoera honen aurrean, euskal presoen ikasteko eskubidea aldarrikatzeko hainbat ekimen burutu egin dira: UPV/EHUn, aipatutako protokoloa aho batez onartu zen eta Errektore Taldeak helegitea jarrita du auzitegietan; UPV/EHUko Gizarte Kontseiluak ere euskal presoek UPV/EHUn ikasteko eskubidearen aldeko adierazpena onartu du. Unibertsitate ezberdinetan sinadura bilketak burutu dira, eta aurten, UPNA/NUPen ere ekimen ezberdinak (atxikimenduak, mahai-ingurua...) burutu dira. Unibertsitate-komunitatean gehiengo zabal batek bat egiten du euskal presoen ikasteko eskubidearekin.

Baina kezka handiz ikusten dugu beste ikasturte bat igaro dela euskal presoen ikasteko eskubidea gauzatu gabe. Zortzi urte pasatu dira 2002-2003 ikasturtean Espainiako Gobernuburua zen Jose María Aznarrek une horretan UPV/EHUn matrikulatuta zeuden preso guztien ikasketak etetea agindu zuenetik.

Egindako lege aldaketaren ondorioz, presoek UNEDetik kanpoko unibertsitateetan ikasi ahal izateko, unibertsitate horiek hitzarmena sinatuta izan behar dute Espetxeetako Zuzendaritzarekin. Orain arte, UPV/EHUko Errektoreak bide horretan egindako eskaerei muzin egin die Espetxeetako Zuzendaritzak, blokeo egoeran aurkitzen garelarik.

Eta horregatik bildu gara gaur hemen, Bilboko Eusko Jaurlaritzaren Hezkuntza Sailaren Bilboko ordezkaritzaren aurrean, Isabel Celaá Diéguez Hezkuntza Sailburuari gutun bat helarazi eta bilera bat eskatzeko.

Eskubide urraketa honen aurrean, Eusko Jaurlaritzako eta Nafarroako Gobernuko Hezkuntza arduradunek ezin dute beste aldera begiratu. Aldiz, Hezkuntza arduradunak izanik, beraiei dagokie bertako herritarrak diren euskal presoen euskaraz eta nahi duten unibertsitatean ikasteko eskubidea bermatzeko urratsak ematea.

Zehazki, Espetxeetako Zuzendaritzarekin beharrezko harremanak egitea eskatzen diegu, Hego Euskal Herriko unibertsitate ezberdinekin, bereziki publikoak diren UPV/EHU eta UPNA/NUPekin, euskal presoek bertan ikastea ahalbideratuko duten hitzarmenak ahalik eta lasterren sina ditzaten; era honetan, datorren ikasturtean, euskal presoek beraiek aukeratzen duten unibertsitatean eta nahi duten hizkuntzan ikasi ahal izateko bidea berriro irekita egon dadin.

Horrekin batera, gure aldetik, euskal presoek euskaraz eta Euskal Herriko unibertsitateetan duten ikasteko eskubidearen alde lanean jarraitzeko konpromisoa berresten dugu.

ATXIKIMENDUAK

Eragileak:
- ELA
- LAB
- STEE-EILAS
- Etxerat
- SalHaketa
- Euskal Herriak Bere Eskola (EHBE)
- Ikasle Abertzaleak (IA)
- Presoen Aldeko Taldeak (PAT)
- Gazte Independentistak
- Txantxangorri Euskara Taldea
- Bilgune Feminista - Hezkuntza
- Gasteizko campuseko AHT Gelditu! Elkarlana
- Gasteizko Unibertsitateko Emakume Taldea (GUET)
- Asanblada Libertarioa - Arabako campusa

Norbanakoak:
Ondoko unibertsitateetako ehunka ikasle, irakasle eta langile:
- Euskal Herriko Unibertsitatea (UPV/EHU)
- Nafarroako Unibertsitate Publikoa (UPNA/NUP)
- Deustuko Unibertsitatea
- Universidad de Navarra
- Mondragon Unibertsitatea

Maiatzaren 19rako bideo-emanaldia eta elkarretaratzea antolatu ditu Arangoitiko PATek

2010-05-12T19:00:00

Ehunka arrazoi ditugu mobilizatzeko, milaka motibo borrokatzen jarraitzeko, miloika gauza aldatzeko... Asko dira kurtso honetan gertatutako onartezinak diren gauzak: gerra zikina, mahai nazionalaren atxiloketa, torturak, gazteria independentistaren aurkako sarekada, sakabanaketa, espetxe politika ankerra, bortizkeria poliziala, senideen aurkako jazarpena, inkomunikazioa, preso politikoen eskubideen ukazioa, errepresioa, elkartasunaren kontrako gurutzada, Jon Anzaren gorpuaren agerpena, UPV-Ares arteko sinatu berri den akordioa, komunikabideen zentsura eta informazioa eza...

Hau guztia, presoen ikasteko eskubidea eta Arangoitiko ikasleak diren Araitz Zubimendi eta Nahaia Aguado ahaztu gabe, aski dela esateko unea iritsi dela diote PAT taldetik. Biltzeko eta mobilizatzeko momentua iritsi da!

Hori guztia salatzeko, Arangoitiko Magisteritza Eskolako Presoen Aldeko Taldeak maiatzaren 19an egingo diren bideo-emanaldi eta kontzentrazioan parte hartzeko gonbidapena luzatu du.

Aski da!
Euskal presoak Euskal Herrira, dagozkien eskubide guztien jabe!

Presoen ikasteko eskubideari buruzko mahai-ingurua zuzenean!

2010-05-03T11:39:00

Ostegunean, maiatzak 6, euskal preso politikoen ikasteko eskubideari buruz UPNA/NUPen antolatutako euskal preso politikoen ikasteko eskubideari buruzko mahai-inguru interesgarria internet bidez zuzenean jarraitzeko aukera egongo da Apurtu Telebistari esker.

Mahai-ingurua 11:30etan hasiko da UPNA/NUPeko Aulategiko 05 ikasgelan eta pertsona hauek hartuko dute parte:

- Patxi Abasolo (UPNA/NUPeko Ekimena)
- Eguzkiñe Aiesa (Elkartasun Taldea)
- Iker Ariztu (Ikaslea eta preso ohia)
- Iñaki Gonzalez Murua (UPV/EHUko Ekimena)

Maiatzaren 6rako mahai-ingurua antolatu da UPNA/NUPen

Presoen Aldeko Taldeak (PAT) (mailto:web@pat-eh.org) — 2010-05-01T13:28:00

Datorren ostegunean, maiatzak 6, euskal preso politikoen ikasteko eskubideari buruzko mahai-inguru interesgarria burutuko da UPNA/NUPen. Ekimena 11:30etan abiatuko da Aulategiko 05 ikasgelan.

Parte-hartzaileak:
- Patxi Abasolo (UPNA/NUPeko Ekimena)
- Eguzkiñe Aiesa (Elkartasun Taldea)
- Iker Ariztu (Ikaslea eta preso ohia)
- Iñaki Gonzalez Murua (UPV/EHUko Ekimena)

Euskal presoen ikasteko eskubidea defendatu dute unibertsitatean

2010-04-28T14:56:00

Leioako campuseko kontzentrazioa (CC-By ukberri.net)

Hilabeteko Azken Asteazkenarekin bat eginez, euskal preso politikoen ikasteko eskubidearen aldeko ekimen desberdinak burutu dira Euskal Herriko campus eta fakultate anitzetan.

Kontzentrazio bana burutu dituzte UPNA/NUP, Ibaeta eta Leioako campusetan eta Bilboko Ingeniaritza Eskolan. Bitartean, Bilboko Magisteritza Eskolan (Arangoiti) eta Ingeniari Teknikoen Eskolan (La Casilla) panel informatiboak eta kartelak jarri dira.

Atzo, berriz, Araban ospatzen den San Prudentzio eguna dela-eta, apirileko Azken Asteazkenaren bezperan 20 bat ikasle mobilizatu ziren Gasteizko campusean euskal preso politikoen ikasteko eskubidearen alde. Bestalde, Gasteiztik salatu zutenez, mobilizaziora deitzeko jarritako kartel eta pankarta guztiak kendu zizkieten, beste kartel guztiak ikutu ere egin ez zituztelarik.

Gasteizko campuseko atzoko kontzentrazioa

Mobilizazioetako irakurgaia:
Abenduaren 16an Leioako campusean eskainitako prentsaurrekoan salatu genuenez, euskal preso politikoek ikasteko eskubidea urratuta dute. Espainiar espetxeetan dauden euskal presoek debekatuta daukate UPV/EHUn edo UPNA/NUPen ikastea, ikasketak UNEDen bidez eta gaztelaniaz burutzera behartzen dituztelarik. Frantziar kartzeletan dauden euskal preso politikoen kasuan, orain arte UPV/EHUn ikasteko aukera bazuten, ikasturte honetatik aurrera ezinezkoa izango zaie ikasketekin jarraitzea.

Unibertsitate-eremuko 600 ikasle, 160 irakasle, 20 langile (AZP) eta 12 eragileren babesa jaso zuen adierazpen hartan, UPV/EHUko Errektorea den Iñaki Goirizelaiari eskatzen genion Espetxeetako Zuzendaritzarekin hartu-emanak izaten saiatzeko, 2005eko urriaren 28an UPV/EHUko Gobernu Kontseiluak aho batez adostutako Protokoloa oinarri hartuta, presoek UPV/EHUn ikastea ahalbidetuko zuen akordioa gauzatzeko helburuari helduz.

Honen harira, urtarrilean UPV/EHUko Gizarte Kontseiluak presoek unibertsitatean ikasteko eskubidearen aldeko adierazpena onartu zuen eta jakin badakigu ere Iñaki Goirizelaia saiatu izan dela Espetxeetako Zuzendaritzarekin harremanetan jartzen isiltasuna erantzun gisa jasoz.

Egoera honen aurrean, unibertsitate-eremuko ikasle, irakasle, langile eta eragileok Euskal Autonomia Erkidegoko eta Nafarroako Foru Erkidegoko hezkuntza arduradun nagusi diren Isabel Celaá Diéguez eta Alberto Catalán Higueras Hezkuntza Sailburuei eskatzen diegu Espetxeetako Zuzendaritzarekin beharrezko harremanak izateko ahalegin guztiak egin ditzatela presoek nahi duten unibertsitatean euskaraz ikastea ahalbidetuko duen hitzarmena sinatzeko helburua gauza dadin.

IKASTEKO ESKUBIDEAREN JABE, EUSKAL PRESOAK EUSKAL HERRIRA!

Presoen ikasteko eskubidearen alde mobilizatu dira Gasteizen

Presoen Aldeko Taldeak (PAT) (mailto:web@pat-eh.org) — 2010-04-27T13:34:00

Gasteizko campuseko kontzentrazioa

Bihar Araban ospatzen den San Prudentzio eguna dela-eta, apirileko Azken Asteazkenaren bezperan 20 bat ikasle mobilizatu dira Gasteizko campusean euskal preso politikoen ikasteko eskubidearen alde. Bestalde, Gasteiztik salatu dutenez, mobilizaziora deitzeko jarritako kartel eta pankarta guztiak kendu dituzte bart, beste kartel guztiak ikutu ere egin ez dituztelarik.

Biharko, berriz, mobilizazio gehiago deituta daude hezkuntza arduradun nagusiei Espetxeetako Zuzendaritzarekin beharrezko harremanak izateko ahalegin guztiak egin ditzatela eskatzeko presoek eurek nahi duten unibertsitatean euskaraz ikastea ahalbidetuko duen hitzarmena sinatzeko helburua gauza dadin.

- UPNA/NUP: 11:30etan.
- Ibaetako campusa: 12:30etam, gelategi azpian.
- Leioako campusa: 11:30etan, kafetegian.
- Bilboko Ingeniari Eskola (San Mames): 14:00etan, G eraikinaren sarreran.

Mobilizazioko irakurgaia:
Abenduaren 16an Leioako campusean eskainitako prentsaurrekoan salatu genuenez, euskal preso politikoek ikasteko eskubidea urratuta dute. Espainiar espetxeetan dauden euskal presoek debekatuta daukate UPV/EHUn edo UPNA/NUPen ikastea, ikasketak UNEDen bidez eta gaztelaniaz burutzera behartzen dituztelarik. Frantziar kartzeletan dauden euskal preso politikoen kasuan, orain arte UPV/EHUn ikasteko aukera bazuten, ikasturte honetatik aurrera ezinezkoa izango zaie ikasketekin jarraitzea.

Unibertsitate-eremuko 600 ikasle, 160 irakasle, 20 langile (AZP) eta 12 eragileren babesa jaso zuen adierazpen hartan, UPV/EHUko Errektorea den Iñaki Goirizelaiari eskatzen genion Espetxeetako Zuzendaritzarekin hartu-emanak izaten saiatzeko, 2005eko urriaren 28an UPV/EHUko Gobernu Kontseiluak aho batez adostutako Protokoloa oinarri hartuta, presoek UPV/EHUn ikastea ahalbidetuko zuen akordioa gauzatzeko helburuari helduz.

Honen harira, urtarrilean UPV/EHUko Gizarte Kontseiluak presoek unibertsitatean ikasteko eskubidearen aldeko adierazpena onartu zuen eta jakin badakigu ere Iñaki Goirizelaia saiatu izan dela Espetxeetako Zuzendaritzarekin harremanetan jartzen isiltasuna erantzun gisa jasoz.

Egoera honen aurrean, unibertsitate-eremuko ikasle, irakasle, langile eta eragileok Euskal Autonomia Erkidegoko eta Nafarroako Foru Erkidegoko hezkuntza arduradun nagusi diren Isabel Celaá Diéguez eta Alberto Catalán Higueras Hezkuntza Sailburuei eskatzen diegu Espetxeetako Zuzendaritzarekin beharrezko harremanak izateko ahalegin guztiak egin ditzatela presoek nahi duten unibertsitatean euskaraz ikastea ahalbidetuko duen hitzarmena sinatzeko helburua gauza dadin.

IKASTEKO ESKUBIDEAREN JABE, EUSKAL PRESOAK EUSKAL HERRIRA!

Azken Asteazkenean presoen ikasteko eskubidearen aldeko mobilizazioak unibertsitatean

2010-04-23T13:42:00

Apirilaren 28an, hilabeteko Azken Asteazkenarekin bat eginez, euskal preso politikoen ikasteko eskubidearen aldeko mobilizazioak burutuko dira Euskal Herriko campus eta fakultate desberdinetan. Gasteizko campusean, San Prudentzio dela-eta, asteartean burutuko da mobilizazioa.

Mobilizazio hauen bitartez, Euskal Autonomia Erkidegoko eta Nafarroako Foru Erkidegoko hezkuntza arduradun nagusi diren Isabel Celaá Diéguez eta Alberto Catalán Higueras Hezkuntza Sailburuei Espetxeetako Zuzendaritzarekin beharrezko harremanak izateko ahalegin guztiak egin ditzatela eskatuko zaie presoek eurek nahi duten unibertsitatean euskaraz ikastea ahalbidetuko duen hitzarmena sinatzeko helburua gauza dadin.

Hona hemen deialdietako batzuk:

Apirilak 27, asteartea
- Gasteizko campusa: 12:00etan, aularioan.

Apirilak 28, Azken Asteazkena
- UPNA/NUP: 11:30etan.
- Ibaetako campusa: 12:30etan, gelategi azpian.
- Leioako campusa: 11:30etan, kafetegian.
- Bilboko Ingeniari Eskola (San Mames): 14:00etan, G eraikinaren sarreran.

PATek UPV eta Aresen arteko akordioa salatu du

2010-04-23T13:04:00

Unibertsitateko antolakunde antierrepresibo gisa, UPV eta Eusko Jaurlaritzaren Barne Sailaren artean sinatutako akordioak suposatzen duen jauzi errepresiboaren aurrean PATek ez du isilik gelditzeko asmorik.

Euskal gizartearen islada eta pentsamendu kritikoaren tenplua izanik, unibertsitatea borroka eta aldarrikapen anitzen lekukoa dugu: inposatu nahi diguten hezkuntza sistema neoliberal arrotzaren aurkako borroka, ikasle presoen eta euskal preso politikoen ikasteko eskubidearen aldeko ekimenak, herri honek bizi duen errepresio latzaren aurkako mobilizazioak, ikasleon eskubideen aldeko grebak...

Baina unibertsitatean, herrietan, kalean bezala, herri mugimenduaren aldarrikapenak isildu nahi dituzte. UPVko agintariek aldarrikapen desberdinen aurrean zelan erantzun jakin ez eta indarkeria eta errepresioa dute lanabes bakarra. Euren ezinaren adibide bat besterik ez da.

Ongizate eta segurtasunaren izenean sinatutako akordio berri hau izango da, hain zuzen ere, unibertsitatean segurtasun eza ekarriko duena. Ertzaintzak baimenik eskatu gabe edozein eremutan egoteko eskubidea izateaz gain, beraien ikerketa ezberdinetarako baliagarriak izan ahal zaizkien datuak eskuratu ahal izango ditu unibertsitateko datu-base edo bideo-kamerak erabiliz, unibertsitate-komunitatearenganako eta bereziki ikasleriarenganako kontrol sozialean urrats nabarmenak emanez.

Unibertsitateko errepresioaren aurkako ikasleok, unibertsitate-komunitateari eta ikasleriari akordio errepresibo honen aurka azaldu eta antola litezkeene protesta-ekimenetan parte hartzeko deia luzatzen diogu.

UPV-ARES AKORDIOA = CAMPUS POLIZIALA
INDAR POLIZIALAK CAMPUSETIK KANPORA!